«Днесь возлюбленнии, Врачеви душевному поклонимся, призывающему нас на исцеление невидимых наших язв, и не гнушающихся наших душевных страстей. Се бо наставает время алкания, душам и телесем нашим спасенное здравие подавая. Постом бо и молитвами, и духовными труды, повелевает помазатися подвижником.

Молитва и алчба победа на диаволом. Молитва и пост богатство благочестия. Молитва и пост смерти вторыя по воскресении избавляета. Молитва и пост добра воина на безплотнаго ратника еста.

Но егда пост и молитва с милостынею будет, тогда делатель благочестия богатство с Богом обрящет. Даяй бо убогим милостыню, Бога одолжает, иже за милостыню к убогим воздает Царство Небесное, и наслаждение райское.

Какая есть польза человеку християнином нарицатися, а дела поганска творити; не по званию бо человецы от Бога честь восприимут, но по делом.

Того ради потщимся братие убежати ярости и гнева Божия, истинным покаянием, постом и слезами, не воздающе никомуждо зла за зло, ни клеветы за клевету, соблюдающе слово Господне, еже рече нам: любите враги ваша, добро творите ненавидящим вас, молите за творящие вам обиды, и взаим дайте от них же не чаете прияти, да будет мзда ваша многа на небесех и сынове Вышнего наречетеся.

Того сыновства братие чающе прияти, вящше подвигнемся, не возвращатися к студным делом и богомерзским деянием нашим: но да преплывше постную пучину, дойдем вышних обителей, славяще Святую Троицу, Отца и Сына и Святаго Духа, ныне и присно, и во веки веком».

(«Златоуст», «Поучение святаго Иоанна Златоустаго о посте»).